Het  gebäört  wol dèkser tot heemkundige kringe sjaole bie hun aktivitèejte betrèkke. Dat kènt neet aanders want het ès on de sjaolkeender van noê tot v’r al motte liêre boê v’r mèt bezig ziên: de lokale geschiedenis, het sósjaal en kultereel lèève ( boê-oonder  het Kanners diejalek) bestuudere en de rezultate van het oonderzeuk bekènd maoke, àoch de middele  bedeenke vur het patrimonjeel errefgood van Kan op te  sloon  en de belangstèlling vur dat errefgoog te oonderhawe en te promote.

Het  fees  van de bazissjaol Nekerdaol pasde dit jaor hil good in de doelstèllinge van  Heemkunde en bezörregde de streek, mesjiêns wol  Limburg ‘ne primâör.

In ‘nen tiêd  tot verluûs  van  kènnis en gebruûk van de diajalekte ’n algemàèjn versjèjnsel ès gewode appresjere v’r  hil àèreg tot de sjaol het Kanners diejalek  as tema  haaw gekoze . .

Mèt ‘n straolende zon as startkadoo  en mèt  e groêt publiek vur te proffetere van de versjèllende optrèèjes  van de keender en van de muziêker wór het  zeker e geslaag “sjaolfees op zich Kanners”.

Ederèen  hèèt z’n bès gedoon vur op dat sjaolfees het  Kanners de plaots te gèève dèj het touwkeump in ós däörep.

Seens de diejalek sjaolaokèètes  in 2000 en 2004 ès het Kanners  door  väöl kontakte niemie weg gewèès in de 5e en 6^e klas  van juffrouw Anita Maesen. Vanaof het sjaoljaor 2009-2010 wórre dèj Kannerse sjaolkontakte te ziên in het Heemkunde beukske in “V’r kalle Kanners”. Àèjn of twie tèekeninge illustreede sommige Kannerse oêtdrökkinge . ’n Belofte tot v’r oêts ’n èkspeziesie  zouwe hawe  mèt alle tèekinge (170) rezulteerde in de tentoênstèlling op het sjaolfees . Zestig tèekeninge kleurde de borde in de turnzaol, e doorlàopend fillemke  van juffrouw Anita  loot,  mèt sjón diejalekleedsjes, tèekeninge ziên en  wèj het diejalekavventuûr op sjaol  begós  ès.  Miê as honderd tèekeninge wórre te bekiêke in mappe op ’n taofel.  Het wór ‘n ech plezeer te ziên wèj keender hun tèekenig(e) zeukde en ontdèkde

‘ne Prachtige verjaordaogskalender met twellef door de sjaol oêtgekoze tèekeninge wood  te kàop aongeboje  vur de priês van 7 euro.

Mèt ‘n makèt  van wèj Kan oêtzoêg in 1805,  gerejallizeerd door J.P. Duplessis,  goêf Heemkunde Kan àoch ’n  interessaante toppenomie- noot  on het sjaolfees.

“Het Sjaolfees op zich Kanners” wór zeker en vas e suksesvàol evenemeent vur de èejgenhèejd van het däorep en van zijn taol oonder de aondaach te bringe van joonk en aad.